قصيدة شعرية بين الابن وابيه الاسير........

الابن:
ماشي والشوك مْرَمَّى عَ دْرابي
بتمنّى بْلهفهْ عَودِة أحبابي
من بَعدَك يابا مَ اصعبْ عذابي
وعَ فراقك روحي ظلّت محزونة
***************************
الأب:
لا تبكي يَابني يا روح الروحِ
حُزنك جوّايا فتّحلي جْروحي
إنتا وخَوَاتك أغلى من روحي
وعن بالي أبَدْ ما بِتْغيبونا
***************************
الابن:
بتذكّرْ يابا يوم اعتقالكْ
جيش الأعادي بْأحقادو جالَك
والتهمة كانت ثورِة نضالك
وين العدالة يا ناس افتونا
***************************
الأب:
درب المجاهد ما في هَوَادة
والسِّجِن عندو خلوة وعبادة
يِسْتنظِر يِختم عمرو بشَهادة
ما تهزّوا رياح العدو المجنونة
***************************
الابن:
راحوا وما بنعرف وين مودّينَك
ولمّا اندلّينا كانوا مْقاضينَك
ثلاثهْ مَأْبّدْ، يا ربِّ يعينك
أحكام الظالم تَيهزمونا
***************************
الأب:
هذا قدرنا أنا واخواني
لكن عاهدنا ربي بإيمانِ
نتحدى القيد وقهر السجّانِ
وشو ما اتجبّروا ما بيهزمونا
***************************
الابن:
دلّت عليك عيون العمالة
مين يورجينا فيهم عدالة
رَيّحْ وطنّا من هالنّذالة
مش منّا يابا هَلّي بيخونا
***************************
الأب:
إلخاين، غدر مْعشّش في راسو
حَرَم هالوطن من خِيرةْ ناسُو
بيجيلو يومُ ونِقْلعْ أساسو
ونجعل نهارو أسود اللونا
***************************
الابن:
شعبي يا يابا وحدو بيجاهدْ
ورغم المصايب عا أرضو صامدْ
مين اللي يوخذ بيدو ويساعِد
بيرُدّ الصدى وما بِيرُدُّونا
***************************
الأب:
لو كلّ العالم عن شعبَك وَلّى
الله معانا يِرعى ويتولّى
وعن مبادينا ما رح نتخلّى
تشهد علينا أرض الزيتونا
***************************
الابن:
وعداً يا يابا، واللهْ نصيري
لَخَلّي دربك دربي ومصيري
واكسر مع شعبي قيدَ الأسيري
ونفدي الحريّة بأغلى ما يكونا
وزندي مع زندَك نهزم صهيونا