ثورة 25 يناير (شهداء التحرير)

ومش بس شهداء التحرير، و400 شهيد اللي سقطوا من يوم 25 يناير، دمهم في رقبة كل المصريين لو ما اتحركوش
العمال اللي كانوا بيعتصموا بالشهور عشان علاوة ولا عشان سبعتلاف جنيه مكافأة نهاية خدمة، لو دول ولادكم اللي انضرب عليهم رصاص حي كنتوا سكتوا؟ انا عارفة العمال بييجوا المظاهرات المليونية، بس ده مش كفاية
حق الشهداء عليكم اللي ماتوا عشان انتوا تعيشوا بكرامة بدل ما كل ما تحبوا تقبضوا مرتباتكم تعملوا اعتصام وتقعدوا تتوسلوا لمبارك ويا بابا مبارك ويا ماما سوزان عشان يديكم حقكم، وبالروح بالدم رزق عيالنا اهم، اهم من ايه؟ اهم من دم الشهدا وبلدكم؟ الناس دي ماتت عشان انتوا تعرفوا تشتغلوا وتقبضوا فلوسكم وتعيشوا بكرامة وما تبقوش على كف عفريت وتتفصلوا من اعمالكم لمجرد ان رجل اعمال اشترى المصنع بتاعكم، وكذلك موظفي الضرائب العقارية
حقهم عليكم انكم تعملوا اضراب شامل
الفلاحين اللي المؤسسات الحقوقية وقفت جنبهم وبعدين اتقبض عليهم، فيه ناس ماتت عشان انتوا ما تنطردوش من اراضيكم، حتعملوا لهم ايه؟
الطلاب في الجامعة، شباب في سنكم ماتوا وهم بيدافعوا عنكم عشان تتعلموا احسن، وعشان الجامعة ما تتحولش ثكنة للامن المركزي وعشان يبقى لكم مستقبل احسن ولما تتخرجوا تلاقوا شغلانة بكرامة بدل ما تنطوا في البحر ولا تتذلوا، المفروض تعملوا اعتصام كبير في الجامعة
الناس اللي في التحرير مستمرين ان شاء الله، وعددهم في تزايد والحمد لله، ووقع منهم شهداء كتير، ولهم حق على المصريين، مش حنعيش طول عمرنا اللي يموت عشانا يتعاقب، كفاية ان اللي استشهدوا في حرب تلاتة وسبعين اهاليهم مش لاقيين ياكلوا، واللي اتصابوا في حرب تلاتة وسبعين بيشتغلوا سواقين تاكسي وميكروباص عشان مش لاقيين ياكلوا بينما اللي كان قاعد في غرفة العمليات في التكييف يقعد على قلبكم تلاتين سنة وانتوا ساكتين وكمان يعاقبكم عقوبة جماعية ويقطع عيشكم ويسلط عليكم بلطجية
طب اهو الحياة مشيت والناس نزلت واشتغلت واتصرفت مرتباتهم ومافيش بلطجية طول ما فيه زحمة في الشارع مع ان المعتصمين النهاردة كانوا اكتر من اتنين مليون في الميدان
امال ايه بقى؟ امال حال البلد كان واقف ليه الايام اللي فاتت؟ اكيد مش من المعتصمين لانهم لسه معتصمين وحال البلد مشي، يبقى مين اللي كان موقف الحال ومين اللي مشاه؟ وليه تسمحوا لنفسكم انكم تبقوا تحت رحمة سفاح زي ده وفاكر نفسه ربنا يرفع اقواما ويخفض اقواما؟
كل الناس عمالة تقولي اتكلمي بالراحة وحايلي، بس انا مافياش احايل، انا فيه واحد مات جنبي على كوبري قصر النيل، وصدقني احساسك بالذنب وانت في مظاهرة ان غيرك مات وانت لسه عايش احساس فظيع جدا، وانا دم الشهدا ده يخصني شخصيا، واللي يفرط فيه عدوي
واللي اراق دم الشهدا هو واللي بيدافع عنه واللي بيدين الضحية واللي ساكت عن الظلم بالنسبة لي زي اسرائيل ما يفرقش عنها حاجة
كنتاكي ايه وايران ايه يا عالم يا جعانة يا اغبيا؟ احنا حنروح نموت عشان كنتاكي ولا عشان ايران قالت لنا روحوا موتوا؟ لا مش مسامحة
مش مسامحة وحسبي الله ونعم الوكيل، واي حد يردد الكلام ده ربنا يحرق قلبه زي ما قلوبنا وقلوب اهالي الشهدا اتحرقت

والعالم بتوع البيانات والمفاوضات والاجتماعات يرحموا دين ابونا بقى، دي مؤامرة علينا عشان يشتتونا، احنا مطلبنا واضح، رحيل النظام
بس كده
لا عايزين رغي ولا اجتماعات ولا بيانات ولا قرف على دماغكم حلوا عنا، اللي مش عايز يساعد يحل عنا، انتوا متعمدين تضيعوا وقتنا وتهدروا طاقتنا في خرافات ومهاترات؟ انا مش حسنة النية ومش حاحسن النية
مافيش حاجة اسمها تروح تتفاوض مع واحد عشان تمشيه، بنقول له امشي يعني امشي، حاروح اتفاوض مع واحد انا طارداه؟
وبطلوا تقولوا يخرج بكرامة، كرامة ايه ينعل ابو شكله، هو فيه بني ادم عنده كرامة يسلط بلطجية على شعبه؟ فيه بني ادم عنده كرامة يضرب رصاص حي على شباب زي الورد كان ممكن ينفعوا البلد عشان هو ماسك في الكرسي؟ فيه بني ادم عنده كرامة يروح للامريكان يقولهم اصلي لو مشيت حينتخبوا لكم الاخوان ويجيبوا نظام ما يعجبكوش ولا يعجب اسرائيل؟ بيبلغ عن شعب؟ فيه بني ادم عنده كرامة يتشتم الشتايم دي كلها وشعبه بيقول له مش عايزك ويفضل قاعد؟ فيه بني ادم عنده كرامة يفجر انبوب الغاز وكنيسة في رفح عشان يستجدي امريكا واسرائيل انهم يساعدوه في البقاء رغم كراهية شعبه له؟ فيه بني ادم عنده كرامة يطلع يشحت على روحه ويقول عايز اموت وادفن في مصر وهو مطلع سبعين مليار دولار برة مصر؟ يعني يطلع الفلوس ويسيب لنا الجتة هنا؟ ما ينعل ابو كرامته في الارض، فين كرامتنا احنا اللي ضربونا وقتلونا وبهدلونا واتهمونا بالعمالة واننا رايحين نموت عشان ناكل وجبة كنتاكي، وناس تصدق الكلام ده؟ اللي يصدق الكلام ده لازم يبقى هو اساسا بني ادم واطي وجعان
وانا مش مسامحة... مش مسامحة اللي ساكت، ومش مسامحة اللي ما بيساعدش، ومش مسامحة اللي بيكرر كلام القناة الاولى، ومش مسامحة اللي اجتمع مع عمر سليمان على دم الشهدا والناس المعتقلة، وحسبي الله ونعمل الوكيل، حسبي الله ونعم الوكيل، حسبي الله ونعم الوكيل، حسبي الله ونعم الوكيل، حسبي الله ونعم الوكيل، حسبي الله ونعم الوكيل، حسبي الله ونعم الوكيل

تسلم اسير الذكريات

زيدنا معلومات خيووو

تقبل مرورى

اسير الزكريات
يعطيك العافية علي الموضوع
وربنا يرحم جميع الشهداء
ويرحم جميع الشهداء المصريين

اميرالقلوب

اكتمل جمال موضوعي بمرورك
لمرورك جذاب ورد خلاب
انتثر حبر اقلامك في ارجاء متصفحي
عطرت صفحتي بتواجدك العطر فوقها
دمت ودام حضورك المتالق

لحن الوفاء

اللهم امين يسلمووو علي روحك العاليه

اكتمل جمال موضوعي بمرورك
لمرورك جذاب ورد خلاب
انتثر حبر اقلامك في ارجاء متصفحي
عطرت صفحتي بتواجدك العطر فوقها
دمت ودام حضورك المتالق

» حماده هلا (شهداء 25 يناير)
» خاص : خسائر ثورة 25 يناير على الزمالك الغاء المئويه وازمه ماليه مضاعفه والحلم الي الهاويه
» نكت ثورة 25 يناير نكت الثورة المصرية النكت المصرية بعد تنحى مبارك
» ثورة حب
» ثورة رجل مخدوع