رسالتي الى الرئيس بشار الاسد ردا على مقال تردد كثيرا في صفحات الفيسبوك

يلي بيدق الباب بيسمع الجواب

----------------------------
ردا على مقال تردد كثيرا في صفحات الفيسبوك

اليكم نص المقال والرد يعقبه

قبل ما تقول محاربة الفساد شوف مين عامل الفساد غير ابوك و خالك و عمك وجارك و ابقى بس يوقفك شرطي المرور وانت عم تحكي مع صاحبتك عالموبايل لا تحط بأيدو المعلوم و ادفع المخالفة
قبل ما تقول حرية علم ولادك عالحرية و فرجيني شو رح يساوو فيكقبل ما تق…ول طوارئ روح شوف اميركا الساعة 4 العصر ما بيسترجي اخو اختو ينزل عالشارع
قبل ما تقول زيادة رواتب شوف حالك اديش عم تشتغل بالنهار اكيد مو اكتر من 35 دقيقة
قبل ما تقول تعليم غير مختلط روح انقلع ع افغانسستانقبل ما تطالب بتحرير الجولان روح اخدم عسكرية و حاج تدور عطرق تتهرب و تفيش
قبل ما تشتكي من الراتب في شي اسمو تحديد نسل حاجة تبظ ولاد و تقول بدي شربون و طعميون
قبل ما تشتكي من البطالة روح ادرس و تذكر التعليم عنا ببلاش … أو تعلم شي صنعة لأنو مانا بسويسرا مشان نعطي رواتب للعاطلين
قبل ما تقول افراج عن معتقلين سياسيين روح شوف هال ولاد الحرام جواسيس لمين
قبل ما تقول حرية الرأي تعلم تفك الحرف و استقر على رأي واحد
قبل ما تنتقد القيادات و تصيرلي فهمان و هاد المحافظ عاجبك و هاد لأ تعلم تقبل نقد العالم لانك لو حطيناك محافظ رح تنهب و تبلع و ما رح تعمل شي للبلد
قبل ما تطلب تغيير قوانين و تحديث و تطوير خلي البنت عندك تتعلم و تقول رأيا
قبل ما تقول الشغل دائر و الحالة الاقتصادية زفت انقبر قوم فتاح بكير و بيكفي تتفرج عالدش
قبل ما تقول هلكونا الضرايب شوف حالك اديه عم تنصب و تربح و تزور و ما حدا عم يحاسبك
قبل ما تقول نظام روح لشي محل و انقبر وقف بالدور او استنى ختيار يقطع الاشارة بدون ما تتحيون و تزمر
قبل ما تقول حضارة و تطوير لا تبصق بالشارع لانو هاي ارض الوطن و انشالله بيبزقوا عليك الشعب كلو
قبل ما تقول النا مطالب لا تاكل هوا و تبيع صوتك بالانتخابات و تنتخب هالكم نصاب و الكم مجرم كرمال كم ليرة .. و انتخب حدا يوصل صوتك بطريقة حضارية
قبل ما تنقلع تساوي حالك رايح تصلي تذكر شو عملت طول الاسبوع بتكذب و بتنصب و بالاخر بتستنى الجمعة لتنقلع تصلي … الله ما رح يغفرلك اذا طلعت تعوي مع هالكم كلب
قبل ما تقول الشعب يريد .. انا رح قلك الشعب شو بيريد …..الشعب بيريد تحطوا صرماية بتمكون و تخرسوا
وهنا كان الجواب
قبل ما تقلي شوف مين عامل الفساد من أبوك أو خالك او مدري مين شوفلي انت ابن مين؟ أكيد ابن عم أو ابن خال شي موظف تعيس بهالوطن اضطر ياخد رشوة أو يسرق ليكمل مصروف الشهر , ولو قلتلي إنك ابن واحد شريف فما أوقحك لأن كل الشرفاء إما منفيين أو بالسجون المؤبدة أو حفظتهن حبال المشانق أوعرفهن دخان الرصاص أما الذليلين فهنن يلي حاطين ( بصله ) بتمهن وساكتين على هالنظام متل حكايتك ومبسوطين من 40 سنة . وبالنسبة للشرطي لو ما بدي حط بإيدو 25 ليرة أكيد بيسلخني مخالفة بــ 2000 ليرة لأنو مو عجزان يطلعلي مخالفة من تحت الأرض.. مثلا ليش مو مفرشي أسنانك أو ليش لابس صباط أسود مو بني .؟ والمرة التانية بوعدك لما تكون اختك راكبة حدي بالسيارة إني كبر راس مع الشرطي وما ادفع المعلوم وخليه يحني ( ظهروا ).
- قبل ما تقلي علم ولادك الحرية يا ريت تفهم انت معناها لأن نحنا شعب وعينا وتربينا بلا حرية عشنا تحت سلطة نظام جبان بيخاف من ظلو لأنو قذر وانا بعتقد انو ريحة الوسخ يلي فينا عادية طالما عايشناه 40 سنة مو 40 يوم , وأنا لما بدي علم أولادي الحرية لازم يفهموها بالاول وبعدين يعيشوها .. متلك تمام .. عشت القهر والذل وتمسيح الصرامي لأسيادك والركوع والسجود وبعدين لساتك حمار ما وصلت لشي , كل ما في الأمر إنك صرت بويجي من الطراز الرفيع.
- وقبل ما تقلي طوارئ وروح لأميركا الساعة 4 العصر امحقلي هالكلاب عناصر الأمن والجعاريه ماهر وبشار عن سجادة هالوطن وبعدين فيك تطلع الساعة 4 الفجر مو العصر .. هي أولا.. وتانيا يا مستفهم قانون الطوارئ ما الو علاقة بزعرنة الشوارع و إنما هو مرتبط بالحروب والكوارث وكل ما يهدد أمن الوطن .. وتالتا .. لما صار هالشي بأميركا مع انو مو بكل ولايات أميركا كان بسبب الحرية الفائضة يلي عندهن ويلي ما عرفو يستعملوها لدرجة الواحد صار بدو يجرب كل شي حتى الانتحار وهالشي ما حيصير عنا بزمن هالحمار.
- وقبل ما تقلي شوف حالك قديش بتشتغل بقلك مو انت يلي بتقرر قديش لان في كلب ناطرني من غيمة لأتأخر عشغلي أو فل بكير مشان يكتب تقريرو لأنو هيك تعودنا بزمن المدفون الله يغمقلو إنو طق البراغي عند المدير شرف ونبل .. وبعدين بلدي فيها خير بكفي أولاد أولادي ليش حتى يسرق الكبار الملايين وأنا احرق عمري وما بوصل الأربعين إلا و كل أمراض الدنيا فيني بس لطلع بآخر الشهر 5 أو 6 الاف ليرة ؟
- قبل ما تقلي انقلع لافغانستان مشان التعليم المختلط روح شوف المدينة الجامعية عندك كم جنين مرمي بالنهر وطلعوه عمال النظافة بأسياخ تسليك المجاري وشوف شو بيصير ورى الوحدات واسأل عمار ساعاتي تبعكن عن هالأشياء لأن عندو ملفات ما بتاكلها النيران وكان يبتز فيها كتير بنات (يعني خطي وقت فراغو الزلمة بدو ينبسط شوي) .. طبعا هالشي كان بالنخبة من المجتمع يعني الطبقة المثقفة وما بدي اظلم الكل حرام لكن هي الأغلبية هيك.. أما إذا كان ببالك تعمل أشياء وانحرمت منها لأنك ما درست بالمختلط فهادا شي تاني.
- قبل ما تقلي روح خدوم عسكرية ولا تتهرب خليني شوف أولاد المسؤولين وين حيكونو لما بتجي شي طلقة وحدة عبلدي ؟؟ موهنن أول الناس يلي بيهربو وببقى أنا وهالوطن ؟؟ طبعا هنن شو إلهن هون, ما كل أموالهن برى وطز بهالوطن . عفكرة عطيني اسم واحد من هدول حضر درس عسكرية وما بدي قلك خدم جيش .. وبعدين مين قلك اني عمطالب بالجولان ما هو البضاعة التي تباع لا ترد ولا تستبدل ومن زماااااااااااااااااااان المدفون باعها وقبض التمن هو و رفعت … صباح الخير .. إقرأ التاريخ منيح بس مو من كتب القومية تبعنا.
- قبل ما تقلي حاج تبظ ولاد خليني ذكرك بقول ربنا :( ولا تقتلوا أولادكم خشية إملاق نحن نرزقهم وإياكم ) يعني تكفل معنا بالمصاريف .. بتعرف خليني جيبها بشكل تاني لأن شكلك ملحد ومالك رب وما بتعرف شو يعني الله غير( الله سوريا جزار وبس ) خليني قلك انو الفائدة يلي بتيجي من رصيد حمارك بسويسرا ورصيد المقبور باسل بتكفي لتصرف لكل واحد من أولادي وأولادك راتب شهري طول ما الرصيد موجود وعم يزيد.
- وقبل ما تقلي روح تعلم وما تشكي من البطالة فأنا يا هيك وهيك خريج علوم سياسية وبشتغل بياع البسة بالنهار وناطور بشركة اسمنت بالليل فكيف بدي اتوظف وهالحمير أصحاب الواسطة أخدو مكاني..؟ بتعرف اشتقت للصحاف هالمرة بدي قول عنهن العلوج أخدو مكاني.
- وقبل ما تقلي عن المعتقلين لمين عم يتجسسوا فأنا بقلك هدول بيتجسسو لحساب هالوطن بس شكلهن ما عجب الحاكم يلي بيتفلسف ويطق حنك بالثاعة والثاعتين عن حرية الرأي والرأي الآخر ما عمر الله.
- وقبل ما تقلي استقر على رأي واحد وفك الحرف بدي بشرك اني أخيراً بعد تفكير 41 سنة استقريت على رأي واحد إن شاء الله يعجبك هو سقوط النظام وفك رقبة آل الأسد.
- وقبل ما تقلي تعلم نقد العالم لألك قبل ما تنقد الآخرين فأنا بقلك بسبب الوضع الزاهر يلي كنا عايشينو بظل آل الفسد فنحنا ما عنا شغل غير بعضنا يعني ننقد بعضنا ونقبل بعضنا … ننقد بعضنا ونقبل بعضنا .. ننقد بعضنا ونقبل بعضنا .. ومن هديك الساعة تعودنا على هالشي والحمدلله ما بتحسس من النقد بدليل اني قريت كلامك عادي ورديت برياحة بدون صوت عالي , أما قصة المناصب فهي يا دادا ما بتتوزع عالمحسوبية يعني إنت اكلت هون وعبيت جيابك تعال خلي غيرك ينهب وإنما بعتقد لازم تتوزع حسب كل واحد شو ممكن يعمل تطورات بهالمحافظة للأحسن يعني حسب الخطة المستقبلية حتى لو كانت العشرية مو الخمسية مو حسب الرصيد بالبنك , وبكل الأحوال هالأمور سطحية كتير بين الحرمية.
- وقبل ما تقلي خلي البنت عندك تدرس وتعبر عن رأيها خليني حس حالي إنسان بالأول وعندي رأي وبعدين بعلم بنتي تحكي رأيها.. مو على أساس فاقد الشيء لا يعطيه ولا شو رايك.
- وقبل ما تقلي انقبر افتاح محلك بكير وبكفي تتفرج عالديجيتل خليني قلك إنو ما بتصير الساعة تسعة الصبح إلا ومر من قدامي أبو قاسم وأبو وائل وأبو عصام وأبو زياد وأبو و أبو و أبو.. يعني شي خمسين واحد كلهن بس بيسلمو وما بيشترو لأن ما عندهن شي بالجيبة والدين ممنوع .. أما بالنسبة للديجيتل فضحكتني والله لأنك ذكرتيني بالتلفزيون السوري , لك حتى الشارة من أيام التمانينات !! طبعا لأن الواسطة الها دور بالمصممين , وأفلام الكرتون مسروقة من اليابان وأخيرا صار عنا أفلام كرتون للكبار بس تركية يعني متل كساندرا بس كساندرا مرة وحدة وهدول طول السنة وباللهجة العامية كمان , وباب الحارة صار بالجزء العشرين والاحدعشري راجع راجع , ويلي ببكي إنو نحنا أصحاب الدراما الأولى على أساس ولما جد الجد وصارت الدراما هي يلي ممكن تنقذ هالنظام الفاسد من محنتو الله لا يفكها صاروا يطلعوا مسلسلات مفبركة شغل اطفال بشدة الغباء متل اعلامنا وزرافتنا.. لك استعينوا بحاتم علي والله مخو نظيف أو شوفوا نجدت انزور شو رأيو..! على الأقل حطو شي خلفية موسيقية تتناسب مع الحدث يعني غنية لميادة بسيليس كذبك حلو مثلا .. ويلي رايح يجنني انو كنا ندفع المئات أيام ما كان الراتب ألفين وتلات بس مشان نحضر مسرحية متل كاسك يا وطن أو غربة أو شقائق النعمان للمنافق غوار يلي هرهرت أوراقو لما مات الماغوط ونصفقلو بحب وحماس , وننطر مرايا على أحر من الجمر لأنها كانت تحكي آلامنا ومشان هيك كان يسميها مرايا لمشاكل المجتمع وفساد السلطات وبالآخر بتجي حضرتك حتى تدافع عن الطاغوت وتشتم هالشعب الحر يلي بدو من الله بقعة ضوء ؟؟!
- أما بالنسبة للضرايب يا فلان فتأكد إنها محسوبة تماما مع نسبة التزوير والرشاوي والنصب ومضروبة بثلاث اضعاف و مشان هيك سموها ضرايب وغير هيك بياخدو زفتية كل سنة والشارع مزفت بدون زفت وبتحس بدهن يطلعو فيه بناية لأنهن عميحفرو فيه أساسات .. وبياخدو مسقفات لأني بهالوطن وحاجز قطعة من السما ما بتمر فيها طيارات اسرائيلة بتوصل للقصر وبترجع وفشار بيحتفظ بحق الرد .. وببيعوني السيارة بضعفين غير ربح التاجر طبعاً بمواصفات ستوك , لأ وكمان كل سنة لازم ادفع عليها طبعا غير ضريبة الرفاهية.. وبيضحكو علي بالاتصالات الثانية بدقيقة طبعا حسب تسعيرتهن مع انو بالسودان أرخص من عنا.. ( حرام رامي كيف بدو يربح ويكون حالو ) صار قد الشحط وما عندو بيت لك حتى صاحبة ما عندو وراح يجن من ماهر وحدة فايتة ووحدة طالعة طبعا الداخل مو متل الطالع لان في سيارات فاخرة بالموضوع.. وبياخدو مني كهربا وبيقطعو الكهربا وبياخدو مي وبيقطعو المي حتى يعطوها لأسرائيل وتركيا بعد ما تنازلو عن لواء اسكندرون مقابل الاعتراف بالكرسي وراح مع اللواء كم نهر متل العاصي والاسود وعفرين .. وبياخدو منا رسوم الهاتف وبتيجينا فواتير غريبة وبياخدو المحصول وبياخدو الغلة وبياخدو رسوم عالحدود كل ما عفت هالوطن وحنيت ورجعت وكل ما دخلت دائرة حكومية بيعطوني ملف أوراق مشان ياخدو على كل ورقة .. وبياخدو ثمن سجني مني وبياخدو كل واحد بيتنفس اكتر من مخصصاتو من الاكسجين لبيت خالتو .. والأغرب من هيك لمن رصيد الواحد منهن بينقص شوي بسبب زيادة مصاريفو أو أسماء بدها تشتري فستان سعرو قد ميزانية الدولة لمدة سنة بيطلعولنا بطابع جديد وضروري لياخدو روح المواطن.. لك وبعد هيك جاي تحكيلي عن الضريبة..؟! لك وضريبة تضرب هيك عيشة.
- وقبل ما تقلي وقف عالدور خلي هالحمار صاحب الواسطة والمحسوبية يصف وراي لما بيجي بعدي أو على الأقل واحد من الدور وواحد من صف الحمير, وبالنسبة للختيار يلي بدو يقطع الاشارة فأنا بقلك عطيني سيارة بشرط ما تلعن نفس يلي نفضني بأقساطها وبوعدك ما استعمل الزمور غير بالأعراس وأنا بنزل وبعدي الختيار بايدي.. شو بدك أحسن من هيك؟
- وقبل ما تقلي لا تبصق بالشارع اسألني مين شفت أو تخيلت أو بشو عم فكر لما بصقت.. خليني أنا جاوب : تخيلت ابن المسؤول يلي مر بهالشارع متل الصاروخ وكان رح يشيلني بطريقو بس مشان يشفط قدام شي فلتانة متلو.. بس مو مشا نهيك انا بصقت وانما لأني تخيلت الحرامي الكبير أبو عيون زرق يلي عارف هالشي وساكت وبصراحة ما قدرت اتحمل البصاقة بتمي فصار يلي صار ولسوء الحظ شفتني حضرتك.
- قبل ما تقلي روح انتخب يلي بيوصل صوتك خليني قلك انو مجلس الشغب لازم يكون كلو مهرجين وبارعين بالتصفيق وأساميهن موضوعة سلف لأنو صاحبك هيك بدو فليش ما اكسب كم ليرة من ولا شي .؟؟
- وقبل ما تقلي تذكر شو عملت والله ما رح يغفرلك لو رحت تشنهق , كنت خبرني إنو الله سبحانه وتعالى وكلك مدير أعمالو وقلك هاد منغفرلو وهادا لأ .. بس مشان راضيك وجيبلك كم كيلو حنطة وكم كيلو برسيم رشوة يعني حتى تتواسطلي عند الله.
- قبل ما تقول الشعب يريد ليش تعبت حالك يا زلمة طلع كلامك غلط لاني كنت بدي قول الشعب يريد شطف الدرج من الأعلى إلى الأسفل وتخليصه من القاذورات الأسدية و الفضلات الذو همية و المخلوفية و الأشنيات الشاليشية و الحاشية والشبيحة و يريد ان يبني مكان قصر الرئاسة مرحاض مجاني , و باختصار شديد : الشعب يريد اسقاط النظام
- أخيراً ولعلمي بانك واحد من زمامير النظام يلي بتنشز وما بتطرب بتمنى توصل هالرسالة لصاحبك بشار الزبالة.

وقد تم نشرها في صفحة الثورة السورية[ندعوك للتسجيل في المنتدى أو التعريف بنفسك لمعاينة هذا الرابط]

دوميانا
كثير من يكتب وكثير من يقرأ
ولكن قليل من يبدع فى رسم الواقع
اشكرك علي كتابة هذه المشاركة
وان شاء الله بتنتهي قسوة هذا الزمن في القريب العاجل
تقبلي مروري من هنا

شكرااااااااااااااا على الموضوع الرائع

تسلميييييييييييييييييييين حبيبتي

مع تحيااتي

[ندعوك للتسجيل في المنتدى أو التعريف بنفسك لمعاينة هذه الصورة]

نجمة السماء كتب:: شكرااااااااااااااا على الموضوع الرائع

تسلميييييييييييييييييييين حبيبتي

مع تحيااتي

[ندعوك للتسجيل في المنتدى أو التعريف بنفسك لمعاينة هذه الصورة]

الشكر كل الشكر لكي يا نجمه السماء اشكر مرورك العطر اختي

[ندعوك للتسجيل في المنتدى أو التعريف بنفسك لمعاينة هذه الصورة]

الــكــاســر كتب:: دوميانا
كثير من يكتب وكثير من يقرأ
ولكن قليل من يبدع فى رسم الواقع
اشكرك علي كتابة هذه المشاركة
وان شاء الله بتنتهي قسوة هذا الزمن في القريب العاجل
تقبلي مروري من هنا

كاسر مرورك عطر صفحه موضوعي الابداع في رسم الواقع عو من ابداعك الشكر كل الشكر لهذه الكلماات الطيبه

[ندعوك للتسجيل في المنتدى أو التعريف بنفسك لمعاينة هذه الصورة]

» فوتوا شوفوا هالبنت الاموره شو بتحكي لبابا بشار الاسد
» مقال رائع عن الزمن الحالي
» المسلسلات التركية (مقال الأسبوع)
» كليب لما نستشهد الطفله ديمه بشار و محمد بشار جديد 2009
» وأبحث عنك كثيرا.. كثيرا..