العشر الاول من ذى الحجة اللى اقسم بها الله فى سورة الفجر

السلام عليكم ورحمة الله وبركاته
اليوم هو 27 ذى القعدة يعنى فاضل 3 ايام وتهل
علينا اجمل ايام الله وهى العشر الاول من ذى الحجة اللى اقسم بها الله فى
سورة الفجر وذلك لعظم فضلها وقدرها عند الله سبحانه وتعالى وطبعاً الايام
دى مش لازم نضيعها من ايدينا لازم نستحث الخطى لتكون الايام دى فى ميزان
حسناتنا وانا النهاردة حبيت اوضح لنفسى ولكم شوية افكار لاعمال نقدر نعملها
فى الايام دى وياريت نفيد بعض ونشجع بعض
على عمل الخير فى الايام دى اى
حد عنده اى عمل نقدر نقدمه لله سبحانه وتعالى يضيفه علشان نأخد ثواب هذا
العمل وطبعاً الثواب للفاعل وللدال على الفعل الدال على الخير كفاعله يعنى
طبعاً من اهم الأعمال وأولها: 1- لمن يقدر صيام العشر الأول اللى هى هتبدأ
ان شاء الله يوم الأربعاء وهتستمر لحد يوم الخميس اللى بعده ان شاء الله
ويوم الخميس هيكون يوم عرفات اللى هو صيامه سنة عن المصطفى صلى الله عليه
وسلم وصيامه يكفر سنة ماضية وسنة تالية بإذن الله اذا تقبله الله وطبعاً
لازم نفضل ندعى فى الايام دى وقبل اى عمل نعمله نستحضر النية ونقول اللهم
اجعل هذا العمل خالصاً لوجهك الكريم وحدك لا شريك لك ولا تجعل لأحد فيه شئ
وتقبله منا يارب بقبول حسن يعنى نعمل العمل لوجه الله سبحانه وتعالى بس ولا
ننتظر من احد جزاء ولا شكور
2- الاكثار من ذكر الله كافة انواع الذكر
اللى نعرفها استغفار حولقة تهليل تسبيح تكبير الصلاة على النبى صلى الله
عليه وسلم وطبعاً التكبير ده الإكثار منه يعنى نقول كتير بسم الله وسبحان
الله والحمدلله والله اكبر او اى شكل من اشكال التكبير المعروفة والإكثار
من حضور جلسات علم واحتساب الاجر يعنى المقصود هنا اننا يوم الثلاثاء الفجر
ان شاء الله او من دلوقتى يكون افضل نستحضر النية اننا هنخلى الايام دى
لوجه الله ونحطها لله وبس يعنى مش كتير على ربنا اننا نقتطع ال12 يوم ده
لوجه الكريم وطبعاً ده فى الأول وفى الأخر لنا لأن ربنا يريدنا لأنفسنا
يريدنا ليزيد من حسناتنا ليدخلنا الجنة يعنى كلنا بنعمل الاعمال دى لأنفسنا
يعنى الأيام دى تكن لله فى كل شئ
3- الإكثار من قراءة القرآن الكريم
وتخصيص ورد حتى اذا كان جزء واحد بس فى اليوم واذا وزعنا الجزء على صلوات
اليوم هنقرأ بس 5 صفحات بعد كل صلاة
4- مساعدة الغير فى الايام الكريمة
دى والتفكير فى افعال جديدة زى ننزل ودور مسنين ودور ايتام الناس دى مش
محتاجة مننا غير شوية وقت نسمعهم فيها وكمان ننزل الجمعيات الخيرية اللى
بتعانى طول السنة من ان معندهاش موارد بشرية علشان تقوم بالأعمال المطلوبة
وكمان اوقات بتبقى محتاجة دعم عينى ومادى علشان الاعمال الخيرية اللى
بتعملها وده كله فى استطاعتنا القيام به طبعاً كلنا عندنا وقت فراغ
كتييييييييير جداً ومش بنعمل فيه اى حاجة ودى هتكون حاجة مفيدة جداً لنا
وللناس المحتاجة مساعدتنا حقاً واننا نحسسهم ان فى ناس مهتمة بهم وبتسأل
عليهم فى وقت بيكون اهاليهم مش بيسألوا عليهم او نسيهم اصلاً (مسنين) او
ملهمش حد اصلاً ( ايتام) وبجد وعن تجربة لما تنزل بجد هتحس بسعادة لا توصف
وان فى حاجات كتير اوى فى حياتنا احنا مش واخدين بالنا منها وده هيزود فينا
نعمه الشكر لله على كل حال على حالنا اللى احنا مش حاسيين به وعلى ان ربنا
قدرنا نساعد وان ربنا استخدمنا
5- الدعاء فى هذه الأيام الكريمة الدعاء
بإذن الله مجاب وكمان تحرى ساعات الاجابة زى الثلث الاخير من الليل اللى
بيتنزل الله سبحانه وتعالى فيه للسماء الدنيا وكذلك يوم الجمعة وليلة
الجمعة والدعاء للامة الاسلامية ولاخواننا فى سوريا وفلسطين وبورما وكاشمير
والشيشان وكل المسلمين المستضعفين فى الأرض وعند الدعاء من سنن النبى اننا
واحنا بندعى نقول بعد الدعوة للمسلمين جميعاً
6- حاجة مهمة اوى لازم
نخليها فى بالنا لما نعمل اى شئ اننا نستحضر النية وكمان نخلى للعمل الواحد
اكثر من نية مثلاً كنية رضا الله سبحانه وتعالى وبنية صدقة جارية لشخص مات
من اهلنا وكصدقة لنا وللمسلمين جميعاً وهكذا يعنى فكر فى العمل اللى
هتعمله وحط له كذا نية وده هيزود فى ميزاننا كتير بإذن الله والدعاء دائماً
الله تقبله منا بقبول حسن واجزنا عليه حسن الجزاء والثواب
7- طبعاً
كلنا بنقول اننا لازم ننصر الرسول صلى الله عليه وسلم ونرد على الاساءات
البذيئة اللى حصلت حط فى نيتك كمان انك هتتعمل الاسبوع ده بعض من سنن النبى
صلى الله عليه وسلم ونتبعها ونعملها وننشر ونعرف غيرنا بها وندعوه بالقول
الحسن انه كمان يعملها والسنن دى ممكن تكون حاجات بسيطة جدا زى مثلاً الاكل
والشرب ونحن جالسين والبعد تماماً عن الاكل والشرب واقفين اولاً لأن دى
سنة نبوية طبعاً النبى صلى الله عليه وسلم لم يأمرنا بشئ الا لأنه خير
والابحاث اثبتت ان الأكل وافقين بسبب الكرش وتهدل عضلات البطن ويسبب الشرب
واقفاً تليف كبدى وكذلك اننا نشرب المياه على ثلاث دفعات الأولى لتهيئة
المعدة للشرب والثانى لتحفيزها للقبول للمياه والثالث تكون المعدة تهيأت
والكبد ولا يؤدى لأضرار جسيمة ودى واحدة من سنن النبى صلى الله عليه وسلم
ودورنا نتعلم اكثر ونتبعه وكده هنكون نصرناه
ارجو الا اكون اطلت الحديث
ده جزء قليل جدا من الاعمال واللى بإذن الله ناوية اعمله ياريت كل واحد يحط
كمان هو عاوز يعمل ايه او ناوية يعمل ايه وربنا يجعل اعمالنا خالصة لوجهه
الكريم سبحانه وتعالى ويجزينا عنها حسن الجزاء